Android ھەۋەسكارلىرىنىڭ ھەممىسىگە شۇنداق بىر نۇقتا ئايانكى، بۇ سېستىما گەرچە ھەرقايسى جەھەتلەردىن خېلىلا مۇنەۋۋەر سانالسىمۇ، ئەمما ئۇيغۇرچىغا بولغان قوللىشى ئىزچىل ياخشى بولماي كەلگەن ئىدى. گەرچە Android ئۇيغۇرچە سېستىما (ROM) بولىقى تارقىتىلغان بولسىمۇ، ئەمما نۇرغۇن تورداشلار ھازىرغىچە Android يانفونلىرىدا ئۇيغۇرچە تور بېكەتلەرنى زىيارەت قىلىش مەسىلىسىدە خېلىلا قىينىلىۋاتقان ئىدى…

ھالبۇكى، Google تېخى يېقىندا ئېلان قىلغان ئەڭ يېڭى Android 4.0 سېستىمىسىدا ئىلگىرىكى نەشىرلىرىگە قارىغاندا، ئۇيغۇرچىنى قوللاش ئەھۋالىدا بۆسۈش خاراكتېرلىك ئىلگىرىلەش بولغان. يەنى ئىلگىرىكى سېستىمىلاردا گەرچە فونت تونۇتقان تەقدىردىمۇ ھەرپلەر ئۇلانمايدىغان ئەھۋال مەۋجۇد ئىدى. Android 4.0 دە بولسا، ھېچقانداق فونت قاچىلانمىغان تەقدىردىمۇ ئۇيغۇرچە ھەرپلەر شۇنداق كۆركەم ۋە ئۇز كۆرۈنىدىكەن. باشقا گەپنى قويۇپ، ئاۋال بىر قانچە رەسىم كۆرۈپ باقايلى.

iPhone ئۆزىدە ھېچقانداق ئۇيغۇرچە فونت بولمىسىمۇ، مۇشۇنىڭغا ئوخشىشىپ كېتىدىغان فونتتا تور بېكەتلەرنى نورمال ئۇيغۇرچە كۆرسىتىپ بېرەلەيتى. بۇ جەھەتتە iOS ئىزچىل Android نىڭ ئالدىدا مېڭىپ كېلىۋاتقان ئىدى. قارىغاندا، بۇ كەڭ Android ھەۋەسكارلىرى ئۈچۈن يېڭى خۇشخەۋەردىن دېرەك بەرسەك كېرەك؟

PS: بىر قىسىم تورداشلار بۇ سۈرەتلەرنى قانداق تۇتقانلىقىمنى سوراپتۇ. بۇ ئەمەلىيەتتە Android تەقلىدچىسى – Android SDK Emulator نىڭ كارامىتى. تورداشلار بۇ تەقلىدكۈچ ئارقىلىق كومپيۇتېردىلا ھەقسىز Android 4.0 سېستىمىسىدىكى يېڭىلىقلاردىن بەھرىمان بولالايدۇ.

مەنزىل تونىلى: بىر تىيىن چىقىم قىلماي ھەقسىز Google يانفونىنىڭ ھوزۇرىنى سۈرۈش – Android تەقلىدچىسى