ئۆزىمىزنىڭ توردىكى ھېساباتلىرى، جۈملىدىن QQ، E-Mail ۋە ھېساباتلىرىمىزغا ئادەتتىكى ھەم ئۇزۇن ۋە مۇرەككەپ پارول بېكىتىش كۆپچىلىكنىڭ نەزىرىدە ئاللىقاچان بىر ئادەتكە ئايلىنىپ بولدى. ئەمما سىزنىڭ پارولىڭىز راستىنلا شۇنچىلىك بىخەتەرمىدۇ؟ بۇ مەسىلىگە ھەقىقەتەن بىر ئېنىق جاۋاپ بېرىش تەس. يېقىندا قۇرۇلغان بىر لاتىنچە يېزىقتىكى تور بېكەت بۇ مەسىلىگە نىسبەتەن ھەقىقەتەن مەنىلىك بىر خىل ھەل قىلىش ئۇسۇلىنى ئوتتۇرىغا قويغان.

بۇ تور بېكەتنىڭ ئىسمى How Secure is my password بولۇپ، ئىسمىدىنلا نېمە تور بېكەت ئىكەنلىگى بىلىنىپلا تۇرىدۇ، تور بېكەت يۈزى ئىنتايىن ئاددى بولۇپ، پەقەت بىر دانە تېكىست رامكىسىدىن تەركىب تاپقان. سىز پەقەت پارولىڭىزنى كىرگۈزسىڭىزلا، پارولىڭىزنىڭ بىخەتەرلىك دەرىجىسىنى كۆرسىتىپ بېرىدۇ. مەن ئۆزۈمنىڭ ئېلخەت پارولىنى كىرگۈزۈپ سىناپ باقتىم، چىقىرىپ بەرگەن نەتىجىسى About 12 years بولدى، يەنى بۇ پارولنى ئادەتتىكى PC بىلەن يېشىپ چىقىش ئۈچۈن 12 يىل كېتىدىكەن!

بۇ خىلدىكى ھېسابلاش ئۇسۇلىنىڭ ئادەتتىكى تور بېكەتلەر چىقىرىپ بەرگەن ئاجىز، نورمال، كۈچلۈك دېگەندەك بىخەتەرلىك كۆرسەتمىلىرىگە قارىغاندا ئابونتقا بىۋاستە بېرىدىغان تەسىرى تېخىمۇ ئېنىق بولۇپ، ئاسانلا كىشىنىڭ قىزىقىشىنى قوزغايدۇ. قېنى سىزمۇ پارولىڭىزنىڭ بىخەتەرلىكىنى سىناپ بېقىڭ، ناۋادا 2 كۈن ئىچىدە يېشىۋەتكىلى بولسا، ئەڭ ياخشىسى ھازىرلا پارولىڭىزنى بىخەتەررەك پارولغا ئالماشتۇرىۋالغىنىڭىز ئەۋزەل. پارولىدىن ئەنسىرەيدىغان يولداشلار ئوخشىشىپ كېتىدىغان پارولنى كىرگۈزۈپ سىناپ باقساڭلار بولىدۇ.

مەنزىل تونىلى: مېنىڭ پارولىم زادى قانچىلىك بىخەتەردۇ؟