شۇنى ئىنكار قىلىشقا بولمايدۇكى، Internet Explorer ئارىمىزدا ئىشلەتكۈچىسى ئەڭ كۆپ تور كۆرگۈنىڭ بىرى بولۇپ ھېسابلىنىدۇ. ھازىر مانا IE9 نىڭ رەسمىي نەشىرىمۇ ئېلان قىلىنىپتۇ! ئاڭلاشلارغا قارىغاندا بۇدا ئېلان قىلىنغان IE9 رەسمى نەشىرى بىلەن كونا نەشىردىكى IE لار  ئوتتۇرىسىدىكى پەرق خېلى چوڭ بولۇپ، يېڭى بىر ئەۋلاد IE تور كۆرگۈسىنىڭ يادروسى دۇنياغا كەلدى دېگەن گەپ…

IE9 دىكى بىر قىسىم يېڭى ئىقتىدارلار

IE9 دا تور بېكەتنى مۇقىملاش ئىقتىدارى قوشۇلغان بولۇپ، ئۆزىمىز ياخشى كۆرگەن مەلۇم تور بېكەتنى تارتىپ ئاپىرىپلا ۋەزىپە ستونىغا مۇقىمدىيالايدىكەنمىز، كېيىن شۇ تور بېكەتنى زىيارەت قىلماقچى بولساق، ناھايىتى قولايلىق ھالدا بىر چېكىپلا ئېچىشقا بولىدىكەن. ئۇنىڭدىن باشقا تور كۆرگۈ ئۆزىدىكى JavaScript ماتورلىرى يېڭىلانغان بولۇپ، تور بېكەتنىڭ ئىجرا بولۇش سۈرئىتى بۇرۇنقىدىن كۆرۈنەرلىك دەرىجىدە تېزلەشكەن، ئەڭ يېڭى HTML5 ۋە CSS3 ئۆلچىمىنى ناھايىتى ياخشى قوللايدىكەن. بۇنىڭدىن باشقا GPU نىڭ ئىقتىدارىدىن پايدىلىنىپ، تور بېكەتنى ئېكرانغا سىزىش جەھەتتە قاتتىق دېتال سۈرئىتىنى تېزلىتىش تېخنىكىسى قوشۇلغان بولۇپ، GPU نىڭ ئىش ئۈنۈمىنى زور دەرىجىدە تۆۋەنلىتىپ، تور بېكەت زىيارەت سۈرئىتىنىڭ تېخىمۇ تېز ۋە راۋان بولۇشى كاپالەتكە ئىگە قىلغان.

مۇشۇ ئەۋلادتىن باشلاپ، IE ئەمدى XP نى قوللىمايدۇ

مىكروسوفت نېمىنى ئويلىشىپ شۇنداق قىلدى بىلگىلى بولمايدۇ، بىراق ھەقىقەت شۇكى، IE9 پەقەت Vista، Server2008 ۋە Windows 7 دىلا ئىشلەيدۇ، XP ئاللىقاچان قوللاش دائىرىسىدىن چىقىرىۋېتىلگەن، بەلكىم بۇندىن كېيىنمۇ قوشۇلماسلىقى ئېنىق. شۇڭا، ناۋادا ئەڭ يېڭى IE9 نىڭ ئۈنۈمىدىن ھوزۇرلىناي دېسىڭىز، ئەڭ ياخشىسى سېستىمىڭىزنى يېڭىلىغىنىڭىز ياخشى.

ئاخىرقى سۆز

IE9 قا نىسبەتەن ئۆزگەرتىشلەر بىر قەدەر كۆپ بولغاچقا، بولۇپمۇ HTML5 ۋە CSS3 قاتارلىقلارغا بولغان قوللاش قاتارلىقلار جەھەتتە، IE9 ھەقىقەتەن كىشىنىڭ تەقەززاسىنى قوزغايدۇ. كۆپ قىسىم تورداشلارنىڭ سىناق نەتىجىسىگە ۋە تەسىراتىغا ئاساسلانغاندىمۇ، IE9 ئىلگىرى ھەرقانداق نەشىردىكى IE دىن كۈچلۈك چىققان بىر مەھسۇلات ھېسابلىنىدۇ. بۇ قېتىم قوشۇلغان GPU تېزلىتىش ئىقتىدارى، ئەڭ يېڭى ئۆلچەملەرنى قوللاش، پاكىزە كۆرۈنمە يۈز ۋە يۇقىرى زىيارەت سۈرئىتى تەمىنلەنگەن يېپيېڭى IE9، ھەرگىزمۇ بىز ئاغرىنىدىغان ئاشۇ ئاستا، ئۆلچەمسىز، زاماننىڭ كەينىدە قالغان Internet Explorer ئەمەستەك قىلىدۇ. شۇڭا دىققەت قىلىڭ: IE9 سىزنىڭ IE غا بولغان كۆز قارىشىڭىزنى مەلۇم دەرىجىدە ئۆزگەرتىۋېتىشى مۇمكىن.

چۈشۈرۈش مەنزىللىرى:

32 بىتلىق Win7 نەشىرى |    64 بىتلىق Win7 نەشىرى |    مەنبە: تورخۇمار |

مۇناسىۋەتلىك ئۇلانمىلار:

Windows 7 ئەسلى ھەقىقى نەشىرىنى چۈشۈرۈش |    كومپيۇتېر سەپلىمىڭىز Win7 غا ماس كېلەمدۇ يوق؟